58/153-

इसा धरती जो रहणे लाइक वणादियां जणासां
माँ बैहण बेटी जेहे कई रोल निभांदियां जणासां
न मैं हुंदा न तुसां हुंदे, नी अज ये दुनिया ही हुंदी
जेकर सिरें जिम्मेबारियां, न उठादियां जणासां

48/143-

सरकार लोकां दी लोकां तांईं, लोक ही वनांदे।
फिरी कुसदे कसूरां तांईं, लोक हुण रौला पांदे।।

लोक हुण रौला पांदे, नी कदी करदे सोच विचार।
दिखी सुणी वोट पाया होंदा, नी मचदा हाहाकार।

लालच स्वार्थ रखी कनारें, करी ने सोच विचार।
ज़ात धर्म पार्टियां छड़ी, सही चुणनी असां सरकार।।

47/142-

इतिहास वदलोणा लगे
विश्वास वदलोणा लगे

जिथु थे पुराणे मसीहा
औथी होर खडोंणा लगे

सेंकने जो रोटियां अपणी
तजरबे नोयें होणा लगे

कदेही बैरन धुंध छायी
अपणे भी पखलोणा लगे

राती धरातेँ कुकड़ वोले
दोपहरां उल्लू रोणा लगे

गोरेयां दे वदनाम नुक्से
फिरी मुड़ी अजमोणा लगे

उड़े जेहडे सफेद हंस
कोआं रंगें रगोणा लगे

पैसा-धेला इज्जत-आबरू
भरे बजारें लुटोणा लगे

आपा-धापी दे इस दौरा च
भगत अपणे घरें प्रोहणा लगे

46/141-

-मुड़ी नी औणा ये दिन-

दिन हपते महीनेयां दे, पहियां पर तुरी जांदा
इक बरी गुज़रेहा वेला, फिरी मुड़ी कुथू आंदा
फिरी मुड़ी कुथू आंदा, वैरी कई नाच नचांदा
हर कोई वक़्ते गुआई, जिन्दगी भर पछतांदा
पुंछा छड्डी सिरे ते पकडा, फिरी पकडौणा ये ज़िन
मित्रो मन्ना मेरी सलाह, मुड़ी नी औणा ये दिन

×××                              ×××                       ×××  

-मुड़ी नी औणा ये दिन-

दिन हपते महीनेयां दे,
पहियां पर तुरी जांदा।

इक बरी गुज़रेहा वेला,
फिरी मुड़ी कुथू आंदा।।

फिरी मुड़ी कुथू आंदा,
वैरी कई नाच नचांदा।

हर कोई वक़्ते गुआई,
जिन्दगी भर पछतांदा।

पुंछा छड्डी सिरे ते पकडा,
फिरी पकडौणा ये ज़िन।

मित्रो मन्ना मेरी सलाह,
मुड़ी नी औणा ये दिन।।