47/142-

इतिहास वदलोणा लगे
विश्वास वदलोणा लगे

जिथु थे पुराणे मसीहा
औथी होर खडोंणा लगे

सेंकने जो रोटियां अपणी
तजरबे नोयें होणा लगे

कदेही बैरन धुंध छायी
अपणे भी पखलोणा लगे

राती धरातेँ कुकड़ वोले
दोपहरां उल्लू रोणा लगे

गोरेयां दे वदनाम नुक्से
फिरी मुड़ी अजमोणा लगे

उड़े जेहडे सफेद हंस
कोआं रंगें रगोणा लगे

पैसा-धेला इज्जत-आबरू
भरे बजारें लुटोणा लगे

आपा-धापी दे इस दौरा च
भगत अपणे घरें प्रोहणा लगे