110/224 -
------------   बकरियां   --------------

हरी भरियां छैल धारां चिटियां कालियां बकरियां।
चुगदियां घा पत्राह लम्मे वालां बालियां बकरियां।

अवाजां पछाणी कने रुकदियां तुरदियां मुड़दियां,
गद्दियां   चोला  डोरा  पाई  संभालियां बकरियां।

वर्फ़े  दी  चिटी  चादर  जाहलू  ओढ़दियां  धारां,
सियालें  मदानी  इलाकेयां  उतारियां  बकरियां।

पहाड़ां  विच  वसदे  सिधे  सादे  मेहनती माहणु,
खेती  करे  कोई  कने  कुन्ही  पालियां बकरियां।

गद्दियां  दे  कुत्ते  होंदे   वफादार  वड़े  होशियार,
जिन्हा  चोरां  जानवरां ते रखवालियां बकरियां।

'भगत'  चरवाहे  गद्दियां दियां क्या रीसां जिन्हा,
हंडी  धारां  जंगल  खड़ैतरीं  चारियां  बकरियां।

106/217-

-------  बोंकरी   ---------

तिनकियां  ज़ोडी वणाई बोंकरी।
रसियां  लपेटी  सजाई  बोंकरी।
खजूर  पतेयां  घा  पठेयां  चुणी,
ज़रूरतां  दिखी  जड़ाई  बोंकरी।

सुवह  सारे  घरें  लगाई बोंकरी।
अंगणे  जो  वख  वंधाई बोंकरी।
हर  पासें   हंडाई   फिराई  करी,
मंजे  हेठ  फिरी  छुपाई  बोंकरी।

करदी रही साफ सफाई बोंकरी।
सड़कां लगाई  लसकाई बोंकरी।
बड़ेयां बड़ेयां  माणुआं ठुक्का ने,
हथ  लई  फ़ोटो खिंचाई बोंकरी।  

104/215-

--------  चुहलीं  ---------

चिका दियां चिणियां घडियां चुहलीं।
चौके   च   वणाई   छड़ियां  चुहलीं।
गोलुये    घोली   ने   छैल   पुतियां,
सुथरियां  होंदियां  वड़ियां   चुहलीं।

सुवह  बोहटियां  वलांदियां  चुहलीं।
गुड़  घी  दी औत  लगांदियां चुहलीं।
कुन्दले च    लकडू    गोहटु   लगाई,
दधुनूयें च   दुध   चढांदियां  चुहलीं।

कनालें  आटा  तोआ  चढ़ाई  चुहलीं।  
छलियां दी रोटी अम्मा बनाई चुहलीं।
सरूआं  भुझी  हंडुयें  रिझदी पचोलें,  
बठाई  बिन्ने पर वखें खुआई चुहलीं।    

दादियें    सामणे    बैठाई    चुहलीं।  
सुनाई   कथां   ठंड   नठाई  चुहलीं।
दादे  दे  हुक्के   दिया  चिलमा  तांई,
गोटुआं   जो   दिंदे    दवाई  चुहलीं।

103/214-

-------  बौड़ियां   ---------

वसदियां वखें  वणियां  बौड़ियां।    
पत्थरां   घड़ी  चिणियां  बौड़ियां।    
अजकल कितणी की वची रहियां,    
सैह  हुण कुनी  गिणियां वौडियां।      

          सारेयां  थीं  संभालदियां बौड़ियां।      
          मने  दे  मैलां उगालदियां बौड़ियां।      
          सिरें कदी कमरें घड़ा रखी ओंदियां,      
          गौरियां अज बी निहालदियां बौड़ियां।

खरी बुरी खबरां दी जगह बौड़ियां।
सुलह सफाईयां दी वज़ह बौड़ियां।
पुछ  पछैण  हालचाल गिले शिकबे,    
चुगलियां नालसियां कलह बौड़ियां।  

          हुण  मुकणे जो आईयां बौड़ियां।    
          कूड़ें  कचडें   भरोईंयां  बौड़ियां।  
          गुज़रे ज़माने दी चीजां वणी अज,    
          लमी  ढां  पाई  रोईयां  बौड़ियां।

101/212-

-----घघरी-----

छैल  साटने  दी  लसकदी  रंगदार  घघरी।
हाखीं  खूब  लुभांदी  वड़ी  शानदार घघरी।        

बोलदे "अस्सी ग़ज घघरी पचासी गज फेर",
वाली  कदी  हुंदी  थी  वड़ी दमदार घघरी।

आसें  पासें   लहरांदी   मने  जो  भरमांदी,          
सोहणियां नारां सजांदी  चमकदार घघरी।    

"मेले  तां  जाणा  घघरिया  चुके  मेरा  देर",      
वाली  सैह  खास  भारी भरकमदार घघरी।

रंग  रुपे  जो  चमकांदी  चार  चाँद लगांदी,      
गोरियां  दी  छैल  चिकनी  गोटेदार घघरी।  

विआहां   दे   लगचारां  कने   विदाई  वेले,    
दुलहण  मुटियारां  दा बांका सिंगार घघरी।  

वड़ेयां  दी   खीरी   विदाई,  देई   फेरियां,
सधवा विधवा पहनी करन नमस्कार घघरी।

हवन  पूजा पाठ  वेले मरद  पाण  धोतियां,  
जणास दा पवितर  पहनावा हरवार घघरी।