104/215-

--------  चुहलीं  ---------

चिका दियां चिणियां घडियां चुहलीं।
चौके   च   वणाई   छड़ियां  चुहलीं।
गोलुये    घोली   ने   छैल   पुतियां,
सुथरियां  होंदियां  वड़ियां   चुहलीं।

सुवह  बोहटियां  वलांदियां  चुहलीं।
गुड़  घी  दी औत  लगांदियां चुहलीं।
कुन्दले च    लकडू    गोहटु   लगाई,
दधुनूयें च   दुध   चढांदियां  चुहलीं।

कनालें  आटा  तोआ  चढ़ाई  चुहलीं।  
छलियां दी रोटी अम्मा बनाई चुहलीं।
सरूआं  भुझी  हंडुयें  रिझदी पचोलें,  
बठाई  बिन्ने पर वखें खुआई चुहलीं।    

दादियें    सामणे    बैठाई    चुहलीं।  
सुनाई   कथां   ठंड   नठाई  चुहलीं।
दादे  दे  हुक्के   दिया  चिलमा  तांई,
गोटुआं   जो   दिंदे    दवाई  चुहलीं।