20/122-

ये ज़मीनां दे टुकडु

टब्बरे जो रोटियां थे खुआन्दे, ये जमीनां दे टुकडु
वेहलेयां जो रिज़क थे दुआन्दे, ये ज़मीनां दे टुकडु

माह मसूर ज़ों चने, आलू ळसन प्याज मतासारा
कणक धान छलियां थे उगांदे, ये ज़मीनां दे टुकडु

भेडां वकरियां गायीं मेंहीं बैलां जो भू पराल छलैड़ा
खूवसारा घा पतराह थे पुगांदे, ये ज़मीनां दे टुकडु

कुछ कुदरत वदली कुछ माणुआं दी फिदरत वदली
खिले पयी ढां लमियां हुण पांदे, ये ज़मीनां दे टुकडु

पालतू गां बैल वणे अबारा, हुण पोन्दे आई जुआड़ा
जंगली जानवरां दी मार खांदे, ये ज़मीनां दे टुकडु

हर माहणु राम नी हुंदा, हर बांदर हनुमान नी हुंदा
पलां छिनां सैह उजाड़ी जांदे, ये जमीन दे टुकडु

'भगत' कुदरता दी कानी वरोवर रहे ताहीं मना खैर
कुसी पासें झुके बंजर वनी जांदे, ये ज़मीनां दे टुकडु