08/63-

धौलाधारे तेरे कई रूप दिखे

कुआरी कुड़ी लगे स्यालें
जाहलु चिटी चादर लान्दी
सूरजे दिआं किरणा दिखी
शर्मान्दी मने मने मुस्कान्दी
सिंगार करि वणी ठणी तू
दिलां' च कई अरमान जगांदी
तिजो दिखी कईयां गीत लिखे
धौलाधारे तेरे कई रूप दिखे

चेहरे छुपाई लेंदी अपणे
जाहलु धुन्द छायी जांदी
लमे लमे साह लई करि
अग दिले दी तू  वुझान्दी
कुनी तिजो धोखा दिता
मिंजो' ने कैं नी ग्लांदी
दस मिंजो पिया मैं पिच्छे
धौलाधारे तेरे कई रूप दिखे

तोंदिया दियां कड़क धुपां'च
किहली गुमसुम वैठी सुकदी
वरसाती दियां फुहारां' च
'चराना' कने गाई नी थकदी
समे कने जेहड़ा अपु जो ढाले
सैह हुंदा माहणु तू दसदी
तिजो ते कई सवक सिखे
धौलाधारे तेरे कई रूप दिखे


(20/05/1973)