30/132-

सुणा जी तोहांजो अज
गल पुराणी सुणांदा
वरसाती जेहड़े होंदे थे
कम्मा दी कहाणी सुणांदा

धाना दा ऊर लगाई,
छौड़ी के नन्दाई
होड्डी ने छलियां
चंगेरी करी गुड़ाई
मर्द जणासां दिंदे थे
खेतां दा कम मुकाई

स्कूलां पोंदियां छुटियां
मूंडु कुडियां डंगरां चरांदे
ग्रांयें ने लगदे वणे जाई
खेलां खेली खुशियां मनांदे
मर्द डाकुए ने करी सेल वटाई
डंगरा दे खुंडां जो जोड़े वनांदे

फटेयां खिंद खंदोलूआं कढ़ी
जणासां टललुआं पांदियां
फटे पुराणे कपड़ेयां कठेरी
नोयें खिंद खंदोलू वनांदियां
मैले खिंद खंदोलू मांजणी गून्त्रें सेडी
लगाई वरखा ओप सुखांदियां

भेडां दिया ऊना दी करी धुनाई
बोहटियां चरखें करदियां कताई
चढ़ाई खड्डियां बुनाईगिर थे
करदे पट्टुआं लोइयां दी बुनाई
अपणे कपड़े अप्पू वणादे थे
लोक अपणे खेतां कपाह उगाई

सोहरियां घरें लई जाणे जो
चांयें कसीदे कुडियां कढ़दियां
सुआटर कोटी सियाले तांयें
कन्ने सलाइयां कोई बुणदियां
बणदे वैहणे जो विन्ने कुथी
पत्ते खजुरां पन्दी तांईँ  चुणदियां

सुणा जी तोहांजो अज
गल पुराणी सुणांदा
वरसाती जेहड़े होंदे थे
कम्मा दी कहाणी सुणांदा